Kloke ord frå Tryggleik- og smittevernsansvarleg

Eit annleis år og ein annleis festival

Vi klarte med eit par vekers margin å få gjennomført fjorårets festival før alt ble snudd på hovudet. Eg trur få hadde sett for seg at vi framleis skulle stå i denne krevjande situasjonen eit heilt år seinare når Noreg vart stengt ned 12. mars.  Det har vert eit krevjande år med mange strenge, men svært viktige, smitteverntiltak som har lagt avgrensingar på handlingsrommet vårt. Her i Indre Sogn har vi vert heldige med låge smittetal, men utbrotet i Balestrand den siste tida har vist at vi på ingen måte er immun mot smitte her heller. Kommunen fekk heldigvis rask kontroll på utbrotet og det verker som at ein har avverja vidare spreiing.

Grunna den pågåande pandemien vil det ikkje vere mogleg for oss å gjennomføre ein festival på same måte som tidlegare, men det betyr ikkje at vi legg oss ned av den grunn. Der festivalen vanlegvis har eit mål om å tiltrekke seg tilreisande til bygda, har vi i år merksemd på å gi eit tilbod til dei som allereie oppheld seg her. Barn og unge – inkludert unge vaksne – har truleg hatt eit særleg tøft år og vi meiner difor at det er viktig å gi eit tilbod til denne målgruppa.

Årets festival vil ha merksemd mot det vil liker aller best, altså utandørsaktivtet i den flotte naturen vår! Aktivitet i naturen gir rom for god avstand noko som òg er eit viktig smitteverntak. Smittevern vil ha særleg merksemd under gjennomføring av alle våre arrangement slik at vi når vår målsetning om at festivalen ikkje skal føre til auka smitte i lokalsamfunnet. For å nå denne målsetninga er det viktig at alle som deltek på våre arrangement og aktivitetar hugsar på dei tre grunnleggjande smitteverntiltaka:

·       Hald minst 1 meters avstand

·       Vask henda ofte og grundig

·       Hald deg heime om du er sjuk

Ikkje kom til oss, vi kjem til deg!

Det er trist å seie det, men viss du ikkje er i området i utgangspunktet så er nok ikkje dette året å kome til Fjellsportfestivalen. Rådet frå myndigheitene er klare, ein bør unngå ikkje naudsynte reiser (og sjølv om fleire truleg ville argumentert for at det å stå på ski i noko av den beste naturen verda har å by på, så kan nok ikkje vi oppmode til det).

Vi forstår at det kan opplevast trist, men frykt ikkje, du kan vere med frå der du er! Du vil kunne delta på konkurransar og aktivitetar gjennom sosiale media. Vi ønskjer å spreie gleda for ski og fjell på våre sosiale plattformar, slik at alle som skulle ønskje dei kunne vere i Sogn og feire med oss òg kan få vere med på dette annleis året. Så følg med på instagram, facebook og heimesida vår!

Trygg til fjells

Planlegging av neste topptur. Bilete er teke januar 2020

Sjølv om smittevern har ein særleg merksemd i år er det viktig å ikkje gløyme tryggleik under festivalen. Vi har satt i verk risikoreduserande tiltak knytt til alle våre arrangement med mål om å gjennomføre innanfor så tryggerammar som mogleg for alle involverte, men det vil alltid vere ein restrisiko.

Eigen ferdsel i fjellet vil alltid innebere ein viss risiko. All ferdsel i fjellet skjer på eige ansvar og det er viktig at alle gjer sjølvstendige vurderingar før ein legg ut på tur. Varsom.no melder om krevjande forhald i fjellet og høg snøskredfaregrad. Det å sjekke oppdatert snøskredvarsel bør alltid vere på sjekklista før ein drar på tur, og under krevjande forhold bør ein kanskje velje å utsette dei mest krevjande turane til ein anna dag.

Eg håper at alle lokale vil vere med å spreie skiglede under heile festivalen, og saman med oss syte for at det vert ein trygg festival på alle måtar!

Festivalteamet v/Mari Severinsen, tryggleik- og smittevernansvarleg